Banco y compliance na Aruba na 2026: sancion Lwtf, e deber di cuido bancario y e lesnan di e hurisprudencia reciente

Ken ta responsabel pa compliance of asunto huridico den un banco, un compania di trust, un casino of un empresa di bien inmobil, mester conoce e desaroyonan aki. Mescos ta conta pa e empresario cu ta para na e otro banda di e balie. Den e articulo aki nos ta pone e situacion actual na fila, exclusivamente riba base di ley, e hurisprudencia publica y e publicacionnan oficial di e supervisornan. Glas & Glas ta conseha y litiga na tur dos banda di e relacion aki: pa institucion financiero y pa nan clientenan (potencial).

1. E marco: dos obligacion cu ta hala den direccion contrario

Un banco na Aruba ta opera bou di dos regimen cu no semper ta mustra den e mesun direccion. Na un banda, e Lwtf (AB 2011 no. 28, ultimamente modifica pa AB 2021 no. 143), hunto cu e AML/CFT Handbook di Banco Central di Aruba (CBA) di 1 di januari 2020, e Regeling uiteindelijk belanghebbende LWTF (AB 2021 no. 153), e Landsbesluit grondslagen bestuurlijke handhaving Lwtf y e Guia (Leidraad) di CBA pa e altura di boet. E reglanan ey ta exigi un investigacion di cliente promer cu drenta un relacion (articulo 3 hunto cu 8 Lwtf), un investigacion intensifica ora tin un risico mas halto – expresamente tambe ora e cliente of e beneficiario final no ta residente di Aruba (articulo 11 alinea 1 sub a Lwtf) –, control continuo di e relacion (articulo 3 alinea 1 sub d Lwtf), reporta transaccion inusual sin demora (articulo 26 Lwtf) y termina un relacion den cua e investigacion no por ser completa mas (articulo 9 alinea 2 Lwtf). E modificacion di 2021 a agrega entre otro e combate contra financiamento di proliferacion y e autoridad di FIU-Aruba pa laga suspende un transaccion te cinco dia laboral (cu por ser prolonga te diescinco) (articulo 28a Lwtf).

Na e otro banda tin derecho civil. Pa motibo di su funcion social, un banco tin un deber special di cuido, tambe pa cu ken ainda no ta cliente. Sin un cuenta di pago ta practicamente imposibel pa participa den bida economico. Hues na Aruba ta sigui riba e punto aki Hoge Raad (HR 5 di november 2021, ECLI:NL:HR:2021:1652): libertad di contrata ta e punto di salida, pero e no ta sin limite, y e resultado ta un balansa di interes den e caso concreto. Un terminacion ta ser evalua ademas na e razonabilidad y ekidad di articulo 6:248 BW. E tension entre e dos regimennan aki ta exactamente loke e hurisprudencia di 2025 y 2026 ta trata.

2. Acceso na un cuenta di banco: e serie Princess

E casonan mas comenta di e aña aki ta trata un explotador di casino cu a pidi un cuenta comercial na tur cuater banco comercial di Aruba y a ser nenga tur caminda. Riba 5 di februari 2026 Corte di Promer Instancia a duna tres sentencia pareu (ECLI:NL:OGEAA:2026:47, 48 y 49). Riba 3 di juni 2026 a sigui e di cuater (AUA202600316 KG). Hunto nan ta forma e marco actual di Aruba pa nenga un cliente.

Loke si ta sostene un nengamento

• Hecho actual y verificabel. Un construccion di permiso di cua e aprobacion no tabata bisto den e documentonan, uso di e cuenta di un tercer persona pa servicio di pago prohibi, un director cu antecedente Lwtf na otro caminda, y cuater director y dos apoderado den un poco mas cu dos aña: riba e basenan ey e nengamento di e promer banco a keda para (ECLI:NL:OGEAA:2026:47, r.o. 4.10–4.11).
• Subsidiaridad. Tanten cu no ta fiho cu tur banco ta tene e porta cera, e interes di e solicitante ta pisa menos (r.o. 4.14). Na juni 2026 e ultimo porta ey a cera – y e resultado a cambia.

Loke no ta sostene un nengamento

• Noticia negativo bieu. Berichtnan bieu tocante e beneficiario final, sin persecucion, condena, investigacion andando of mencion riba lista di sancion, ta insuficiente. E banco mester por señala conducta despues di e sucesonan reporta (ECLI:NL:OGEAA:2026:47, r.o. 4.8; AUA202600316 KG, r.o. 4.11).
• Maneho interno inconsistente. Un banco cu ta bisa cu e ta atende solamente tenedor di permiso, pero den practica tin otro explotador como cliente tambe, ta perde e argumento ey (r.o. 4.10).
• Exclusion categorico. Un maneho pa no atende un sector completo – aki: casino independiente – ta, sin obhecion concreto y hustifica, un exclusion categorico no permiti (AUA202600316 KG, r.o. 4.11).
• Un apelacion no fundamenta riba banco corespondiente. E importancia di e relacionnan ey ta ser reconoci, pero e banco cu a tuma contacto y no kier a bisa cua contesta el a haya, no a sali bon (r.o. 4.12). Ken ta usa e argumento aki mester por mustra ken a ser contacta, ki ora, cu cua pregunta y cu cua contesta.

Dos consideracion tin consecuencia mas leu cu e dosier aki. Promer, hues por condena un banco pa realmente ehecuta e investigacion di cliente y complet’e den un plazo, tambe ora e no ta ser obliga (ainda) pa contrata (ECLI:NL:OGEAA:2026:48). Segundo, violacion di e deber special di cuido ta expresamente un acto ilicito pa cu e aspirante-cliente (AUA202600316 KG, r.o. 4.6): banda di un orden bou di multa coercitivo – aki Afl. 5.000 pa dia te un maximo di Afl. 1.000.000 – ta menasa pues un reclamo di daño. Si risico di integridad por ser maneha cu condicion na e cuenta (sin efectivo, limite, monitoreo intensifica), Corte a laga esey expresamente habri na februari pa un procedura di fondo (r.o. 4.17); na juni a reprocha e banco cu e no a investiga e posibilidad ey. Ey ta e apertura practico mas importante pa banconan.

3. Termina y de-risking: Corte Comun na maart 2026

Pa relacion existente Corte Comun tabata strict caba na 2020: un banco cu a termina un relacion di casi binti aña riba base di risico di sector, publicidad bieu y preocupacion tocante banco corespondiente, a ser ordena pa sigui e relacion te ora e cliente haya otro banco, pasobra el a presenta “muchu poco material di hecho concreto” y no a coopera pa haya un solucion (Corte Comun 15 di mei 2020, ECLI:NL:OGHACMB:2020:134). Corte a adverti e tempo ey caba cu de-risking ta conduci na re-risking y cu FATF tambe a pronuncia su mes contra dje.

Riba 18 di maart 2026 Corte Comun a confirma e liña ey den un caso di Sint Maarten cu ta mescos relevante pa Aruba (ECLI:NL:OGHACMB:2026:60). Un banco a anuncia cu lo restringi e cuentanan di dos compania pasobra e beneficiario final a nenga di yena e cuestionarionan KYC periodico di nobo; segun e, nada no a cambia desde e ultimo biaha. Corte ta reconoce sin reserva cu un banco ta legalmente obliga, y pues tambe autorisa pa cu su cliente, pa verifica periodicamente si su datonan di cliente ta correcto ainda, y cu e ta deriva e autoridad ey tambe di su condicionnan general (r.o. 4.3). Pero e banco a perde, pa cuater motibo cu cada departamento di compliance mester conoce:

• Bisa exactamente kico ta falta. E banco no a haci cla cua informacion e tabata falta cu e cliente mester a duna segun e condicionnan; un contesta manera “mi mes, consultant” mester ser lesa na luz di e pregunta haci, y ora tin duda mester sigui pregunta adicional promer cu menasa cu cerramento (r.o. 4.6).
• Ofrece un forma practicabel. Un declaracion skirbi y firma cu e datonan duna anteriormente ta actual ainda, plus un carta di firma nobo, tabata algo cu e banco por a proponi; no a bira bisto cu e cliente a nenga di haci esey (r.o. 4.5 y 4.11).
• Señal bieu no ta sostene un terminacion nobo. Señalnan di 2018 tocante transferencia halto, despues di cua e cuentanan a ser libera atrobe, no tabata motibo pa un terminacion na 2024 (r.o. 4.7).
• Mustra e perhuicio. No a bira bisto cu e banco a sufri perhuicio dor di e nengamento – sancion di e supervisor, daño di reputacion cerca otro banco (r.o. 4.8).

E multanan coercitivo a ser reduci te USD 100.000 pa cuenta cera y USD 2.500 pa dia pa otro violacion di e orden, cu un maximo di USD 100.000 (r.o. 4.12), pero e nucleo ta keda: e deber di cuido ta exigi cu e banco ta pensa hunto y ta coopera. Terminacion pasobra e investigacion di cliente realmente no por ser completa ta para riba e base firme di articulo 9 alinea 2 Lwtf; terminacion pa motibo di un apetito di risico cambia ta un decision di maneho cu ta ser evalua completamente na e deber di cuido. E diferencia entre e dos mester ta bisto den e dosier.

4. Ehecucion pa Banco Central: e marco di boet di Corte Comun

Na e banda di supervision e desaroyo mas importante ta cu Corte Comun den tres sentencia di 14 di januari, 11 di februari y 18 di maart 2026 a fiha e marco pa evalua boet Lwtf (ECLI:NL:OGHACMB:2026:5, 2026:18 y 2026:19, y 2026:49). Nan ta sigui riba dos sentencia di 2025 (ECLI:NL:OGHACMB:2025:231 y 2025:264). E reglanan principal:

• E suma base ta halto. Infraccion di categoria 2 – entre otro e investigacion di cliente, e obligacion di reporta y e control continuo – tin un suma base legal di Afl. 500.000 pa infraccion separa, cu un maximo di Afl. 1.000.000 (articulo 37 alinea 2 Lwtf hunto cu e Landsbesluit). CBA ta trata violacion repeti di un mesun regla durante un periodo di investigacion como un solo infraccion.
• E Guia y e modelo interno di calibracion ta valido. E Guia tin siete paso: gravedad y duracion, culpabilidad, recidiva, capacidad financiero obhetivo, benficio obteni, test di proporcionalidad y capacidad financiero individualisa. Corte ta considera tanto e Guia como e modelo interno di calibracion no publica di CBA den e limite di ley; e hues administrativo si ta evalua si e resultado den e caso concreto ta proporcional y sino ta fiha e boet e mes (ECLI:NL:OGHACMB:2026:18, r.o. 4.1 y 6).
• Muestra ta permiti. Un investigacion cu ta cubri tur transaccion riba e limite di indicador cu e institucion mes a reporta ta un muestra representativo; e porcentahe di reporte laat ta determina e gravedad (r.o. 7.1). Corte a agrega un correccion: ora tin menos cu dies reporte laat of ausente, e porcentahe calcula ta ser reduci “bou di e liña” cu 12,5%, asina cu e cantidad absoluto tambe ta conta (r.o. 10.1).
• Reporta laat riba propio iniciativa no ta yuda. Reporta un transaccion cu retraso promer cu e investigacion di CBA no ta duna reduccion: “sin demora” ta nifica cu FIU ainda por intervení, y esey no ta posibel mas si ta reporta (hopi) laat (r.o. 9.1). Tampoco e ausencia di perhuicio pa tercer, disturbio di mercado of beneficio financiero ta conta na fabor: esey ta incorpora caba den e suma base.
• Investigacion intensifica tin contenido. Pa un cliente no residente, e investigacion intensifica ta inclui un investigacion di e fuente di e fondonan y un investigacion amplio riba internet. Corte ta respalda e interpretacion ey, pero a huzga cu e a bira conocibel solamente cu e Handbook 2020 (1 di januari 2020): transaccion di promer cu e fecha ey pues no por a ser sanciona, un transaccion di januari 2021 si (ECLI:NL:OGHACMB:2026:49, r.o. 13.1).
• Prestador chikito of grandi. E reduccion pa capacidad financiero ta depende di e tamaño di e institucion segun e definicionnan di e Guia (prestador chikito: por lo menos dos di e criterionan menos cu dies empleado, entrada menos cu Afl. 1 miyon, total di balansa of capital propio bou di Afl. 3 miyon); e definicion di OESO no ta determinante (r.o. 7.1). Pa institucion di credito ta wak e capital propio.
• Plazo. E autoridad pa impone un boet ta caduca tres aña despues di e dia cu e incumplimento a ser constata, no tres aña despues di e infraccion mes (articulo 41 alinea 1 sub b Lwtf; ECLI:NL:OGHACMB:2025:231, confirma den 2026:49, r.o. 5.1). Si e procedura ta dura muchu tempo, e boet ta ser reduci segun un escala fiho: 5% si e exceso ta menos cu seis luna y 10% te un aña, cada bes cu un maximo di Afl. 2.500; mas aya 5% extra pa mitar aña, cu maximo di Afl. 5.000 (te dos aña) y Afl. 10.000 (despues) (ECLI:NL:OGHACMB:2026:5, r.o. 4.3).
• Cumulacion. CBA ta aplica e reduccion di 10% pa cumulacion solamente cu tres boet of mas; cu dos boet e test individualisa di capacidad financiero por yuda (ECLI:NL:OGHACMB:2026:18, r.o. 12.1).
• Ken ta prestador di servicio? Un explotador di casino cu ta traha cu un permiso provisional di Minister ta prestador di servicio den e sentido di Lwtf y por ser sanciona, tambe si e permiso definitivo a ser otorga despues (ECLI:NL:OGHACMB:2025:264).

Practica ta mustra cu ta trata di suma serio: un banco a haya na final un boet di Afl. 320.000 pa no controla su clientenan continuamente y pa reporta transaccion inusual laat (ECLI:NL:OGHACMB:2026:5); un comerciante di prenda Afl. 355.812,50 (ECLI:NL:OGHACMB:2026:49); un desaroyador di proyecto Afl. 161.200 (ECLI:NL:OGHACMB:2026:18). Ademas, infraccion por ser cometi tambe pa persona natural (articulo 37 alinea 3 Lwtf) y un boet of instruccion definitivo por ser haci publico (articulo 44a Lwtf) – pa un institucion cu ta depende di banco corespondiente hopi biaha e consecuencia mas pisa.

5. UBO, PEP y e cliente no residente

Cu cliente internacional e investigacion casi nunca ta pega riba e persona huridico mes, pero riba e pregunta ken ta tras di dje. E Regeling uiteindelijk belanghebbende LWTF (AB 2021 no. 153) ta traha den escalon: promer e persona natural cu directamente of indirectamente tin mas cu 25% di e capital of e derecho di voto; ora tin duda of ausencia, esun cu por ehercé control efectivo na otro manera; y solamente si esey tampoco por ser determina, esun encarga cu e direccion general. Pa trust ta conta un circulo cumulativo: fundador, trustee, protector, beneficiario y cualkier otro persona cu control final. Ken ta registra e director estatutario como UBO sin documenta e promer dos paso, no a determina un UBO, pero a yena un espacio.

Si e UBO of e cliente no ta residente, investigacion intensifica ta obligatorio (articulo 11 alinea 1 sub a Lwtf) – y na maart 2026 Corte Comun a confirma kico esey ta inclui minimo: fuente di e fondonan y un investigacion documenta riba internet. Si e UBO ta un persona politicamente expone (PEP), drenta of sigui e relacion mester ser aproba na nivel di direccion y e fuente di e patrimonio mester ser establece; e status ey ta sigui cinco aña y ta extende na miembro di famia y asociado cercano (articulo 12 Lwtf). E hurisprudencia di 2026 ta agrega un les civil: loke e banco ta haya den e investigacion aki mester ta actual y verificabel, pasobra solamente esey lo sostene despues un nengamento of terminacion.

6. Reporta, suspende y sancion: FIU-Aruba na 2026

E obligacion di reporta ta keda e regla riba cua mayoria di boet ta basa. Riba 1 di april 2026 FIU-Aruba a publica un guia practico tocante reporta transaccion inusual, cu e meta pa yuda prestadornan di servicio cumpli cu nan obligacion. E informe anual 2025 di FIU ta mustra cu e aña ey 61.704 transaccion inusual a ser reporta, mas cu dies porciento mas cu na 2024, cu casino como e reportador mas grandi entre e prestadornan no financiero y cu bien inmobil, activo virtual y transparencia di beneficiario final como punto di atencion. Ken ta reporta di bon fe ta libra di responsabilidad civil pa cu tercer (articulo 30 Lwtf) y e datonan reporta no por ser usa contra e reportador mes (articulo 29 Lwtf); e contraparti ta e prohibicion pa informa e cliente tocante e reporte (articulo 31 Lwtf). Desde 2021 FIU por laga suspende un transaccion tambe (articulo 28a Lwtf); un prestador ta cumpli cu e orden ey sin demora.

Derecho di sancion tambe a pidi atencion na 2026. Na juni 2026 FIU-Aruba a publica guia tocante e reintroduccion di e sancionnan di Nacionnan Uni contra Iran y e obligacionnan di reporta conecta, y desde 1 di juli 2026 Zimbabwe no ta suheta mas na sancion financiero dirigi bou di e landsbesluit provisional tocante regimen di sancion prioritario. Screening di sancion pues no ta un control statico di lista mas, pero un proceso cu e institucion mester por demostra cu cada cambio.

7. Kico esaki ta nifica: un agenda pa banco y nan clientenan

Pa institucion financiero

• Skirbi cada carta di nengamento of terminacion como si fuera hues lo les’e. Na 2026 e e-mailnan di banco a ser cita palabra pa palabra den sentencia. Menciona e hechonan concreto y actual; evita etiketa di sector y publicidad bieu.
• Distingui articulo 9 alinea 2 Lwtf di apetito di risico. Si e investigacion di cliente no por ser completa, registra kico a ser pidi, ki ora, cu cua plazo y kico a ser ricibi. Si ta un decision di maneho, conta cu un evaluacion completo na e deber di cuido y cu e deber pa coopera na un solucion.
• Investiga un oferta mitiga promer cu nenga. Cuenta sin facilidad di efectivo, limite, monitoreo intensifica, obligacion contractual di informacion: registra pakico esey ta of no ta suficiente. E reproche ey tabata decisivo na juni 2026.
• Documenta e argumento di banco corespondiente. Ken a ser contacta, ki ora, cu cua pregunta, cu cua contesta.
• Reporta na tempo, no laat. Corte no ta duna atenuacion pa reporte laat spontaneo. Inverti den deteccion di indicador obhetivo y den e tempo entre señal y reporte.
• Test bo investigacion intensifica na e Handbook 2020. Fuente di fondo, investigacion riba internet, aprobacion PEP na nivel di direccion, documentacion di cada paso di e determinacion di UBO.
• Conoce e calculo di boet. Ken ta domina e siete pasonan di e Guia, e definicionnan di tamaño y e correccion di 12,5% ora di contesta un intencion di boet (articulo 38a Lwtf), ta negocia riba otro nivel. No lubida e plazo razonabel: e ta cuminsa cu e carta di intencion.

Pa empresa dilanti di un banco

• Entrega e dosier completo, incluso contexto. Den e serie Princess un solo documento faltante – e peticion subyacente na Minister – a haci e diferencia entre perde y gana.
• Coopera, tambe si bo no ta di acuerdo. E cliente cu a gana na maart 2026 a cumpli cu ley y cu e condicionnan; e banco no a ofrec’e un forma practicabel. Ken ta nenga informacion ta perde e proteccion di e deber di cuido.
• Pidi un decision motiva y alternativa. Un banco cu no ta investiga si un cuenta bou di condicion ta posibel ta core un risico real di procedura.
• Kort geding ta un instrumento real. Orden pa haci investigacion di cliente, orden pa habri of sigui, multa coercitivo y – expresamente desde juni 2026 – un base pa compensacion di daño.

Pa termina

E liña roi di 2025 y 2026 ta consistente. E supervisor por ta strict y hues ta respalda su marco di boet; na mes momento e mesun hues ta exigi di banconan cu nan ta basa nan decisionnan tocante cliente riba hecho actual, concreto y verificabel, cu nan ta pensa hunto tocante solucion y cu nan ta realmente ehecuta nan investigacion di cliente en bes di reemplas’e cu un maneho di sector. Compliance y deber di cuido no ta contrario, pero dos banda di e mesun dosier. Ken tin e dosier ey na orden ta para firme dilanti di CBA y dilanti di hues.

Glas & Glas Attorneys and Legal Consultancy ta conseha institucion financiero, compania di trust, casino y empresa di bien inmobil tocante compliance Lwtf, contesta y apelacion contra boet di Banco Central, y tocante e banda civil di onboarding, terminacion y de-risking. Nos ta asisti tambe empresa cu ta confronta un relacion bancario nenga of termina. Na Papiamento, Hulandes, Ingles y Spaño.

E articulo aki ta destina exclusivamente pa informacion general y ta basa riba e Landsverordening voorkoming en bestrijding witwassen en terrorismefinanciering (AB 2011 no. 28, manera ultimamente modifica pa AB 2021 no. 143), e regulacionnan basa riba dje, publicacion di Banco Central di Aruba y FIU-Aruba, y sentencianan publica riba rechtspraak.nl te cu augustus 2026. E sentencia di 3 di juni 2026 (AUA202600316 KG) no a ser publica; ta cita for di e copia na nos disposicion. No por deriva ningun derecho di e articulo aki.

Fuentenan

• Landsverordening voorkoming en bestrijding witwassen en terrorismefinanciering (Lwtf), AB 2011 no. 28, ultimamente modifica pa AB 2021 no. 143: e.o. art. 1, 3, 3a, 5, 8, 9, 11, 12, 26, 28a, 29–31, 33, 37–41, 44a, 47–48
• Regeling uiteindelijk belanghebbende LWTF (Regulacion ministerial di 14 di september 2021, AB 2021 no. 153); Landsbesluit grondslagen bestuurlijke handhaving Lwtf; Regeling indicatoren ongebruikelijke transacties (AB 2012 no. 47)
• Banco Central di Aruba, AML/CFT Handbook (version 1 di januari 2020); Leidraad vaststellen van de hoogte van bestuurlijke boetes; Questions and Answers regarding the AML/CFT State Ordinance
• FIU-Aruba, Practical Guidance on the Reporting of Unusual Transactions (1 di april 2026); guia tocante reintroduccion di sancion di Nacionnan Uni contra Iran (12 di juni 2026); comunicado regimen di sancion prioritario – Zimbabwe (1 di juli 2026); Annual Report 2025
• Corte di Promer Instancia di Aruba 5 di februari 2026, ECLI:NL:OGEAA:2026:47, ECLI:NL:OGEAA:2026:48 y ECLI:NL:OGEAA:2026:49 (nengamento di cuenta di banco; investigacion di cliente)
• Corte di Promer Instancia di Aruba 3 di juni 2026, AUA202600316 KG (orden pa habri cuenta di banco; exclusion categorico; banco corespondiente)
• Corte Comun di Husticia 18 di maart 2026, ECLI:NL:OGHACMB:2026:60 (Sint Maarten; restriccion/terminacion planea di cuenta; deber di cuido y compliance)
• Corte Comun di Husticia 15 di mei 2020, ECLI:NL:OGHACMB:2020:134 (terminacion di relacion bancario; de-risking)
• Corte Comun di Husticia 14 di januari 2026, ECLI:NL:OGHACMB:2026:5 (boet institucion di credito; plazo razonabel)
• Corte Comun di Husticia 11 di februari 2026, ECLI:NL:OGHACMB:2026:18 y ECLI:NL:OGHACMB:2026:19 (marco pa boet Lwtf; Leidraad; muestra)
• Corte Comun di Husticia 18 di maart 2026, ECLI:NL:OGHACMB:2026:49 (investigacion intensifica; caducidad; tamaño di prestador)
• Corte Comun di Husticia 17 di september 2025, ECLI:NL:OGHACMB:2025:231 y 5 di november 2025, ECLI:NL:OGHACMB:2025:264 (caducidad; concepto di prestador di servicio na casino)
• Hoge Raad 5 di november 2021, ECLI:NL:HR:2021:1652 (deber special di cuido di banco; acceso na un cuenta di pago)